DÍA VIÑO D.O. 2023: AS DENOMINACIÓNS DE ORIXE DE VIÑO REIVINDICARANSE COMO PATRIMONIO COLECTIVO DAS ZONAS RURAIS
O 13 de maio celébrase a festa do viño D.O. Ese día, 33 denominacións de orixe de viño de múltiples zonas do noso país levarán a cabo diferentes actividades en lugares emblemáticos dos seus territorios, cun brinde colectivo e simultáneo como acto central en todas elas, que terá lugar ás 13.30h (ás 12.30h, en Canarias). Festas patronais, mercados de abastos e tradicionais, enclaves á beira do mar ou nas ladeiras da montaña, embarcacións fluviais ou claustros de mosteiros medievais son algúns dos escenarios nos que levarán a cabo catas guiadas, actuacións musicais en vivo, experiencias enoturísticas, degustacións de viño D.O. con gastronomía local e maridaxes innovadoras… actividades destinadas a que a xente poida gozar, nun ambiente festivo e reivindicativo, dun dos produtos con maior calidade e prestixio do noso país, o viño con denominación de orixe.
A D.O. Ribeira Sacra súmase este ano á acción para o celebrar o Día Viño D.O. no Centro do Viño da Ribeira Sacra, despois de brindar en edicións anteriores nun catamarán polo Sil ou na igrexa de Diomondi, rehabilitada como albergue do Camiño de Inverno. O Presidente da D.O. Ribeira Sacra, Antonio Lombardía, asegura que, “O 13 de maio brindamos polo traballo que facemos todos cada día para manter o territorio que habitamos, enxalzamos o viño con D.O. que leva o nome do noso terra e do noso esforzo por todo o mundo”.
O Día Viño D.O. celebrará este ano a súa sétima edición e farao baixo o lema “Denominacións de orixe, patrimonio colectivo”, co que reivindicar que unha D.O. conforma e preserva un patrimonio, formado por persoas, produto e territorio. Tras as persoas, vocación, saber-facer e paixón. Tras o produto, o froito dunha terra e dun coñecemento acumulado durante décadas, que xera ingresos que quedan na zona e dinamizan a súa economía. E tras o territorio, unha paisaxe e unhas condicións naturais e históricas únicas para a produción de uva e para a elaboración de viño.
Goce e reivindicación, a partes iguais, é a fórmula empregada na celebración do Día Viño D.O., acción colectiva que, desde que naceu en 2017, a iniciativa da Conferencia Española de Consellos Reguladores Vitivinícolas (CECRV, a organización que representa ás denominacións de orixe de viño), ten unha aspiración permanente: botar a semente para que se declare oficialmente un Día do Viño no noso país e lograr así que este sector teña, anualmente, unha data coa que visibilizar ante a sociedade o que supón e o que achega o viño ás zonas rurais, ás súas xentes e ao conxunto do país. Trátase, ademais, dunha pretensión apoiada por unha proposición non de lei aprobada no Congreso dos Deputados en 2017, que insta o Goberno a declarar o Día do Viño. Dita proposición foi presentada a proposta de CECRV e logrou o respaldo maioritario dos grupos parlamentarios.
As 33 denominacións de orixe de viño que participan este ano no Día Viño D.O. son: Alicante, Almansa, Binissalem, Calatayud, Campo de Borja, Cariñena, Catalunya, Cigales, Condado de Huelva, Jumilla, La Mancha, Lanzarote, León, Málaga, Manchuela, Monterrei, Montilla-Moriles, Navarra, Pla i Llevant, Rías Baixas, Ribeira Sacra, Rioja, Rueda, Sierras de Málaga, Somontano, Tacoronte-Acentejo, Toro, Txakolí de Álava, Txakolí de Bizkaia, Uclés, Valencia, Vinos de Madrid y Yecla. Todas elas brindarán á vez, o 13 de maio, ás 13.30h (12.30h en Canarias), polo viño D.O., polos valores que encerra (diversidade, calidade, autenticidade, coidado e respecto polo saber facer local e polo medio natural, arraigamento e recoñecemento do medio rural, goce, cultura…) e polo patrimonio colectivo que hai detrás de cada unha.
A Conferencia Española de Consellos Reguladores Vitivinícolas (CECRV) é a asociación sen ánimo de lucro que representa ás denominacións de orixe de viño ante a Administración Xeral do Estado e ante as institucións da Unión Europea, recoñecida polo Ministerio de Agricultura, Pesca e Alimentación como interlocutor da Administración en materia de figuras de calidade. CECRV forma parte tamén da European Federation of Origin Wines (EFOW), xunto ás organizacións representativas das indicacións xeográficas do resto de grandes países produtores europeos (Francia, Italia e Portugal, ademais de España).
Sobre o Día Viño D.O.:
Movemento Viño D.O. é a marca coa que a Conferencia Española de Consellos Reguladores Vitivinícolas (CECRV) diríxese ao consumidor para difundir o concepto denominación de orixe e os valores ligados aos viños con D.O. (diversidade, calidade, autenticidade, coidado e respecto polo saber facer local e polo medio natural, arraigamento e recoñecemento do medio rural, goce, cultura…). Coa devandita marca xurdiu o Día Movemento Viño D.O. que este ano 2023 cambia de nome e pasa a chamarse Día Viño D.O. Esta acción celebrouse por primeira vez en 2017 e desde entón, nas súas seis edicións, conseguiu axuntar a miles de persoas brindando polo viño con denominación de orixe en diferentes puntos de España. Trátase dun día para celebrar a existencia das DDOO, a súa diversidade e a súa achega á sociedade.