88 Viños da Ribeira Sacra Baixo o escrutinio dos Catadores Guía Peñín
A prestixiosa Guía Peñín visitou hoxe a Denominación de Orixe Ribeira Sacra, onde dous dos seus catadores realizaron unha exhaustiva cata de 88 viños na sala de catas do Consello Regulador da Ribeira Sacra. “Esta visita pon de manifesto a importancia e o recoñecemento dos viños da rexión no panorama vitivinícola nacional e internacional” - comentou Antonio Lombardía, presidente da D.O. Ribeira Sacra durante a degustación.
Durante a sesión de hoxe, os catadores da Guía Peñín avaliaron unha ampla variedade de viños elaborados na Ribeira Sacra, contribuíndo así á valoración e difusión da calidade destes viños na súa próxima publicación. A Guía Peñín é un referente imprescindible para os amantes do viño e os profesionais do sector, e a súa visita subliña o crecente prestixio da Ribeira Sacra no mundo do viño.
Esta cata segue a recente visita do sumiller Ferran Centelles, que o pasado 16 de maio acudiu tamén ao Consello Regulador da Ribeira Sacra para realizar unha cata dos viños da comarca. Centelles, recoñecido sumiller e colaborador do equipo elBulli, destacou a singularidade e calidade dos viños da Ribeira Sacra, reafirmando o potencial da comarca no panorama vitivinícola.
O Consello Regulador da Ribeira Sacra móstrase entusiasmado con estas visitas, que non só validan o esforzo e a dedicación dos viticultores locais, senón que axudan a posicionar a denominación de orixe no mapa dos grandes viños.