A D.O. RIBEIRA SACRA PARTICIPA NA 39ª EDICIÓN DO SALÓN GOURMETS
O Consello Regulador da Denominación de Orixe Ribeira Sacra participará na 39ª edición do Salón Gourmets, que se celebrará do 13 ao 16 de abril no recinto feiral IFEMA (Madrid). A representación da Denominación situarase no Pavillón 6 (Stand 6G10-2), dentro do espazo institucional da Axencia Galega da Calidade Alimentaria (AGACAL). O Salón Gourmets defínese como unha cita anual dedicada exclusivamente aos produtos de alimentación e bebidas de alta gama, contando nesta edición cunha superficie de 65.000 m² onde se presentan máis de 55.000 produtos ante unha audiencia profesional composta por distribuidores, hostalaría, tendas especializadas e prensa técnica.Con esta participación, o Consello Regulador D.O. Ribeira Sacra reforza a súa estratexia de apoio ás adegas inscritas, facilitando o contacto dos seus viños cos canais de comercialización nacional e internacional. A presenza neste certame permite ao Consello Regulador incidir na relación entre o medio físico da Ribeira Sacra e o perfil dos seus viños, definidos polas condicións de cultivo e as prácticas de viticultura condicionadas pola propia orografía desta denominación de orixe. Para iso, a D.O. Ribeira Sacra disporá dun Túnel do Viño cun total de 25 mostras representativas da súa produción actual: brancos da variedade Godello (colleitas 2024 e 2025, incluíndo Godello Barrica) e unha ampla selección de tintos encabezada pola Mencía (anadas 2020, 2022, 2023, 2024 e 2025 en categorías de Barrica e Garda), ademais de Brancellao Barrica e Tinto Summum.A atención técnica no stand e o desenvolvemento das actividades oficiais correrán a cargo de Ruth Fernández Vidal. A axenda programada inclúe, o 14 de abril, a participación no 1º Curso de Embaixadores de Viños de Pequenas D.O. na Escuela Española de Cata. Así mesmo, o 15 de abril (de 13:00 a 13:45 h), terá lugar unha cata comentada de viños da D.O. Ribeira Sacra, unha sesión técnica orientada a profesionais do sector onde se analizarán as características das variedades autóctonas e os factores xeográficos que determinan a produción vitivinícola na Denominación de Orixe.