A Denominación continúa a súa traxectoria ascendente
A D.O. Ribeira Sacra comercializará 5.139.029 litros de viño
O pleno do Consello Regulador acaba de dar a aprobación definitiva aos datos de recollida de uva da pasada campaña. A cantidade definitiva de uva recollida foi de 6.999.560 quilos de uva, a maior cantidade conseguida pola D.O. Ribeira Sacra desde a súa posta en marcha. No mercado converteranse en 5.139.029 litros de viño. No pasado ano embotelláronse 3.486.847 litros.
A campaña 2011 déixanos outras cifras. Os concellos con maior número de hectáreas inscritas son, por esta orde: Pantón, Sober e Chantada. Os municipios con máis viticultores inscritos son os mesmos, pero cambia a orde: Chantada, Sober e Pantón e en canto ao número de adegas, a maior parte instálanse en Sober, con 36 adegas no seu termo municipal, 19 en Chantada e 8 en Pantón.
As cifras, sumadas á crecente demanda dos nosos viños, avalan a traxectoria ascendente da Denominación.