Finlandia e Estonia interésanse polos viños da D.O. Ribeira Sacra
Este mércores 22 de maio, a sede do Consello Regulador da Denominación de Orixe Ribeira Sacra recibe a visita dos participantes da Misión Inversa Finlandia e Estonia que organiza o ICEX en colaboración coa Oficina Económica e Comercial de España en Helsinqui.
A visita está prevista para as 17.00 h. Durante a súa estancia na sede do Consello presentaráselles a Denominación de Orixe e terán a posibilidade de catar diferentes viños. Ademais aproveitarán a estancia na Denominación para visitar varias adegas. Este tipo de encontros comerciais serven para abrir novas alternativas de negocio e son importantes ferramentas de promoción comercial con estes países.
Participan na misión inversa desde Estonia: Lynda Ellen Coogan, Experta en viños e gastronomía, creadora de The Wine Tasting Ireland; Kristjan Markii, Director da Asociación de Sumilleres de Estonia e Organizador de eventos importantes de viño en Estonia; Aivar Vipper, Membro e Profesor da Asociación de Sumilleres de Estonia, escribe para a prensa especializada e participa activamente na organización das feiras de viño do seu país.
Desde Finlandia chegan: Sanna Maskulin, Redactora xefa da revista Glorian Ruoka ja Viini desde 2009, revista principal de life style de Finlandia; Sanna Pöyry, Xornalista especializada en textos de viño, organizadora de catas para empresas e grupos privados; Sami Repo, Fotógrafo profesional especializado en comida e viaxes e Leena Nyrhi, Analista de Mercado da Oficina Comercial de Helsinqui.