Todo preparado para a XX Cata dos Viños da Ribeira Sacra
O Conselo Regulador da D.O. Ribeira Sacra xa ten todo preparado para a XXª edición da Cata dos Viños da Ribeira Sacra, que celebrarase no Parador de Monforte de Lemos os días 22 (precata) e 23 de maio (cata final).
O pasado 19 de maio os técnicos do Consello Regulador finalizaron a recollida de mostras nas adegas participantes nesta XXª edición.
As adegas participantes nesta edición son 37 e as mostras totais inscritas son 67: 34 mostras inscritas na categoría de viños tintos, 19 mostras inscritas na categoría doutras anadas e 14 mostras inscritas na categoría de viños brancos.
Os premios que se outorgarán tanto na categoría de viños tintos coma na categoría de viños brancos serán tres: Medalla de Ouro, Medalla de Prata e Medalla de Bronce; e na categoría de viños doutras anadas outorgaranse dous premios consistentes en dúas Medallas de Ouro.
A entrega de premios terá lugar o venres día 23 de maio no Parador de Monforte de Lemos.
O panel de cata estará composto por 10 expertos catadores:
- Luis Moreno Buj: Colaborador de diversas revistas especializadas en viño e da Televisión de Valencia.
- María Isabel Mijares e García Pelayo: Experta en Viticultura e Enoloxía.
- Mar Romero Peratón: Xornalista especializada en viños e gastronomía, presentadora do programa "Mesa e Descanso" en Gestiona Radio.
- Concepción Cuetos Suárez: Actriz. Catadora Oficial Internacional. Colaboradora de viños no suplemento de El Periódico de Catalunya. Vicepresidente de Mujeres del Mundo del Vino.
- José María Martínez Alonso: Membro do Panel de Cata de Ribeira Sacra. Summiller. Propietario Viñoteca "Ou Beiro".
- Antonio Raluy Rodríguez: Membro do Panel de Cata de Ribeira Sacra. Membro da Asociación Galega de Catadores.
- Iria Otero Mazoy: Membro da Asociación de Sumilleres Gallaecia.
- José Luís Martínez Lorenzo: Membro da Asociación Galega de Enólogos.
- Waldo Carreras Albo: Experto en Viticultura e Enoloxía.
- Bruno Krammener: xornalista internacional.