Luís Gutiérrez de "The Wine Advocate" cata os viños da denominación
Luís Gutiérrez, catador para os viños de España da publicación estadounidense "The Wine Advocate" dirixida por Robert Parker, unha das publicacións máis influentes a nivel mundial, estivo esta mañá na sede do Consello Regulador para catar diferentes viños brancos e tintos de diferentes anadas e de diferentes adegas.
É a segunda vez que Luís Gutiérrez visita Ribeira Sacra e realiza unha cata, a vez anterior foi en outubro de 2014 e froito da súa cata publicou un extenso artigo na revista ?"he Wine Advocate".
Nesta ocasión tamén visitará outras denominacións de orixe de Galicia e publicará o correspondente artigo a finais do próximo mes de abril.
Na súa segunda visita a Ribeira Sacra catou preto de 50 referencias diferentes, sobre todo da anada de 2014. As súas valoracións sobre a evolución dos viños amparados baixo a denominación de orixe foron moi positivas, e resalta o carácter dos viños que captan á perfección a paisaxe e o terruño de Ribeira Sacra.