Final de Vendima
O pasado 6 de Outubro finalizou oficialmente a vendima na D.O. Ribeira Sacra cun total de 5.515.694 quilos recollidos, na súa maioría da variedade Mencía, auténtica pedra angular na Ribeira Sacra.
O pasado 19 de agosto comezaba puntualmente a vendima na Denominación de Orixe para aquelas adegas que polas características e localización dos seus viñedos facían que a uva cumprise os parámetros esixidos polo Consello Regulador.
O día 7 de setembro foi a data oficial recomendada polo Pleno do Consello Regulador para o inicio da vendima. En total foron 49 días de intensa actividade nos viñedos e adegas da denominación de orixe.
"É unha vendima temperá. Pero non tan longa. É unha vendima que se foi realizando moito máis graduada do que era normal con respecto a outros anos. As maduracións na denominación son moi variadas e as adegas que compran uvas en distintos lugares van ampliando ese espazo de recollida de uva porque é a maneira de ter unha materia prima de maior calidade. Vanse adaptando á realidade da maduración e non facer unha vendima rápida en dúas semanas". José Manuel Rodríguez, Presidente do C.R.D.O.R.S.
A calidade do froito recolleito e o seu estado sanitario foron moi bos, a pesar da complexidade dunha tempada na que os incidentes meteorolóxicos complicaron as perspectivas da colleita. Durante os días que durou a vendima as condicións meteorolóxicas foron favorables; xa que o tempo foi seco e apenas houbo choivas, aspecto que propiciou que a uva entrase nas adegas nun estado fitosanitario bo.
A cantidade de quilos por variedades é a seguinte:
Variedades tintas:
- Mencía: 4.656.820 kgs
- Brancellao: 37.804 kgs
- Merenzao: 49.136 kgs
- Caiño: 17.359 kgs
- Garnacha: 303.759 kgs
- Mouratón: 5.008 kgs
- Souson: 74.667 kgs
- Tempranillo: 41.755 kgs
Variedades brancas:
- Albariño: 58.812 kgs
- Dona Branca: 4.360 kgs
- Godello: 234.574 kgs
- Loureira: 838 kgs
- Torrontés: 2.911 kgs
- Treixadura: 27.861 kgs
Esta última colleita está na media de cantidade de quilogramos recollidos dos últimos 5 anos.
COLLEITA 2012: 5.452.206 KGS.
COLLEITA 2013: 4.735.899 KGS.
COLLEITA 2014: 4.773.674 KGS.
COLLEITA 2015: 6.227.365 KGS.
COLLEITA 2016: 5.585.306 KGS.